Sanjak Sunda Buat Lomba

Tutuwuhan

Karya : Rachmat M. Sas Karana

Tutuwuhan ngawarah kuring

Nitah sabar

Ka pelok anu kapelak

Teu bisa nanyakeun

Iraha bakal buahan

Tutuwuhan ngawarah kuring

Nitah surti

Akar nu ngeteyep nyiar kahakanan

Teu kadéngé rumahuhna

Tangkal nu lungsé butuh cihujan

Teu kadéngé jumeritna

Daun alum kapanasan

Heunteu kadéngé inghakna

Tutuwuhan ngawarah kuring

Nitah nyaho mulang tarima

Ka lemah tempatna matuh

Muragkeun dadaunan

Pikeun kasuburan

Ka manusa nu melakna

Méré bubuahan

Geusan nyambung kahirupan